ရခိုင်ကျီးဖြူသာခြင်း

(တန်းခိုးဆရာထွန်း၊ ရခိုင်သကြစ်-၁၂၈၂ ခုနှစ်မှာ စပ်ဆိုပါ၏)

နမောတဿ ဘဂ၀တော အရဟတော သမ္မာသမ္ဗုဒ္ဓဿ

သုံးပါးမယေရတနာ၊ မြတ်ဆရာနှင့်၊ မာတာပီတ၊ ဂုဏ်ပေါင်းကဲလွန်၊ နှုံးမတန်အောင်၊ အနန္တကို၊ ကန်တော့သုံးလီ၊ ထုံးကေသီမှာ၊  သရဘီစံကား၊ နန်းဂေါ်သဇင်၊ ပန်းတော်ဝင်သို့၊ ဆင်ပန်ထားမှ၊ ဥာဏ်သွားလည်းထက်၊ ရှိအဆက်က၊ ဆန်းလက်လာငြား၊ လူကြီးများရို့၊ ပြောဟောတိုင်မူ၊ အရေးယူ၍၊ ကျီးဖြူဝတ္ထု၊ ရှိဖြစ်မှုကို၊ ယခုတဖန်၊ စပ်ကာရံဖြင့်၊ အကျွနုပ်သည်၊ ရှိလွန်လီကေ၊ သက်သီထုံးကို၊ ကုံးလိုက်မည်က၊ သပြီလက်ယာ၊ မြီမျက်နှာတွင်၊ အောင်ချာပူရ၊ ထီးနန်းတည်၍၊ ဌာနီချကေ၊ အဋ္ဌ၀လာ၊ မြို့ပြည်ရွာကို၊ တည်ခါကာလ၊ မြီဝသုန်မှာ၊ ပစ္စုန္နလျှင်၊ သွန်းချဖြိုးဖြိုး၊ ၀ရဇိန်လေ၊ ထိန်ကာကြိုးလို့၊ မိုးကြီးသျှစ်ခါ၊ ရွာခြင်းရာကြောင့်၊ တွင်ခေါ်နာမ၊ နဂရကို၊ အဋ္ဌ၀လာ၊ တွင်တုံပါ၍၊ ဗြမ္မာသက္က၊ အသမ္ဘိန်လေ၊ နရိန္ဒဟု၊ နာမတွင်ငြား၊ ထိုးမင်းဖျားလျှင်၊ တရားလျှော်ရာ၊ များပြည်သူကို၊ ထီဖြူမိုးကေ၊ စိုးစိုင်ခါ၌၊

မြို့ရွာအနား၊ လယ်ချောင်းထွန်၍၊ လုပ်ကြံစားကေ၊ မယားနှင့်လင်၊ သူရို့တွင်၌၊ ချစ်ကြင်မညီး၊ အသီးသီးကေ၊ သမီးကများ၊ သားမရတတ်၊ မြင့်တာရှည်လေ၊ နီပြန်လတ်က၊ နောက်ထပ်မကြာ၊ ချစ်သမီးကေ၊ အထွီးမှာက၊ ရုပ်ဝါရူပ၊ လှလည်းလှလို့၊ မြကုံးစိန်ကုံး၊ ပုလဲကုံးကေ၊ ရွေးလုံးအသွင်၊ မိနှင့်ဘရို့၊ စိတ်ကထင်၍၊ ခေါ်တွင်တသီး၊ ကြင်မညီးကေ၊ သမီးသက်နှံ၊ ရုပ်ပိုင်းပြင်မှာ၊ ရွှင်ပြုံးပြုံးနှင့်၊ စိတ်ကုံးတံဟု၊ ဘုန်းကံကကြီး၊ ချစ်သမီးမှာ၊ ရင့်သီချိန်လှောက်၊ လောကီအနွယ်၊ ဂေါရီမေလေ၊ အရွယ်ရောက်လို့၊ ဆံတောက်လှလှ၊ နောက်ကချကေ၊ ကာလသမီး၊ မိဘထံမှာ၊ လှစံသီက၊ မကြီးမငယ်၊ တင့်အတယ်လျှင်၊ လရွယ်တက်စ၊ တနိသ၌၊ မိဘနှစ်ပါး၊ သမီးများနှင့်၊ စောစောမိုးထက်၊ ထမင်းချက်လို့၊ ကျက်ကတ်တုံပြီး၊ အသီးသီးလျှင်၊ သမီးမိဘ၊ ဂေါင်းချင်းဆုံးကေ၊ စားတုံကြလို့၊ ကိစ္စပြီးခါ၊ နှမ်းတဖျာကို၊ လှမ်းကာလည်းထား၊ စိန်ကုံးတံဟု၊ လှစံသီးကေ၊ သမီးအားလျှင့်၊ မှာထားသည်မှာ၊ ဤနှမ်းဖျာတွင်၊ စောင့်ကာနီငြား၊ ဂြိုးဇရက်နှင့်၊ ကျီးငှက်များကို၊ မစားခင်ဖြစ်၊ နားလျှင်လိုက်၍၊ မေချစ်နီကေ၊ ရပ်ကိုလည်လို့၊ သူငယ်တခြား၊ တော်လျှော်ရာမှာ၊ အဘော်များဖြင့်၊ ကစပ်ပြီးထွေ၊ မနီလီကဲ၊ ညနီချမ်းခါ၊ တောကလာသော်၊ စားငှာမညီး၊ ချစ်သမီးဘို့၊ သစ်သီးပန်းမှန်၊ အီးချိုရသာ၊ ပြန်လာပါကေ၊ ငါရို့မိဘ၊ သမီးလှဖို့၊ ဆွတ်ခမည်ဟု၊ မှာပေတုံပြီး၊ အသီးသီးကေ၊ မိဘနှစ်ပါး၊ သမီးများနှင့်၊ စားရန်သောက်ရန်၊ အတံတံကို၊ ရှာကြံလိုခြင်း၊ ကျန်မကြွင်းအောင်၊ ဟင်ခူးထင်းခြွီး၊ တောမြိုင်ခြီကို၊ လားသည်ကာလ၊ စိန်ကုံးတံဟု၊ အတန်ကြီးကေ၊ သမီးလှကို၊ မိဘမှာထား၊ အပျင်းလည်းဖြေ၊ ညမင်းသျေလျှင်၊ မေကစပ်လို့၊ နီငြားကာလ၊ ရှိဘ၀က၊ မိဘသားချင်း၊ တ၀မ်းတွင်း၌၊ မောင်ရင်းနှမ၊ ဖြစ်ဘူးကြသည်၊ မဏ၀နတ်သား၊ ထိုကြောင်းအင်ကို၊ သိမြင်ငြားက၊ ထင်ရှားမယေ၊ မစ, ရန်ကို၊ ကြံတော့သည်လေ…။….။

ကြံတုံလီကေ၊ ရံရွယ်ဖြစ်ငြား၊ ယခုဆိုလေ၊ ထိုနတ်သားမှာ၊ ထံပါးငါးရာ၊ အရံပါနှင့်၊ ဖန်ကာလုပ်ငြား၊ လွန်ဆန်းပြားကေ၊ ကျီးသားငါးရာ၊ ထိုနှမ်းဖျာမှာ၊ နားလာတုံကျင်၊ မစားခင်လျှင်၊ မေမြင်သောခါ၊ ကစပ်ရာက၊ ဟောကာလည်းနှင်၊ ထိုခါတွင်၌၊ ယခင်နတ်သား၊ အနည်းငယ်လေ၊ ရွီးချယ်ငြားလို့၊ စားပါရစီ၊ ဆိုတုံလီကေ၊ နည်းငယ်ကိုထား၊ တလုံးပင်လေ၊ ၀င်မစားစကဲ့၊ စကားဆိုခါ၊ ကျီနတ်သားမှာ၊ ပြောခြင်းရာကား၊ ရုပ်ဝါလှပ၊ မစားစီချင်၊ ငါရို့ကိုနှင်သည်၊ နှမ်းသျှင်မလေ၊ မစားရကျင်၊ ငရို့လျှင်လေ၊ ငြိုငြင်ဒုက္ခ၊ မဟုတ်လှပါ၊ ကျီးမတကောင်၊ စိမ်းညိုရောင်မှာ၊ ဆောင်သည့်ကိုယ်ဝန်၊ ပဋိသန်လျှင်၊ ဟိပြန်ခြင်းရာ၊ ရင့်တုံပါ၍၊ အာသာဆန္ဒ၊ နှမ်းကိုမြင်ကေ၊ စားချင်လှလို့၊ တောင်းရသည်သာ၊ ဆိုသောခါလျှင်၊ ဖျာမှာဟိဖွယ်၊ တစိချေသာ၊ စားပါလီဆို၊ ထိုကျီးညိုရို့၊ ဖျာကိုမမြင်၊ ထိုခါတွင်၌၊ ၀င်ကာလည်းနား၊ လှမ်းသည့်ဖျာမှာ၊ ငါးရာစားကေ၊ တနားလောက်ကြာ၊ ကုန်သောခါလျှင်၊ ကုမ္မာရီရွယ်၊ ထိုမိငယ်က၊ ကြည့်လီတုံကျင်၊ ကုန်သည်မြင်သော်၊ ရင်ကိုထုခတ်၊ မိဘရောက်ခါ၊ ငါ့ကိုသာလျှင်၊ များစွာသတ်မည်၊ ငိုတုံပေက၊ ထိုသည်များစွာ၊ ကျီးငါးရာလျှင်၊ ကြာနာသနား၊ နှုတ်ချိုသံနှင့်၊ ဆိုစကားမှာ၊ ပျိုချောနှမ၊ ညှိုးကာပိန်၍၊ စိုရိမ်နှောင်းကေ၊ မကြောင်းကြနှင့်၊ အဘသတ်လျှင်၊ မိရင်ခွင်ကို၊ ၀င်ကာလည်းပြီး၊ မိမာတာလျှင်၊ နာကြင်လတ်အောင်၊ သတ်ကာဆီးလည်း၊ မေကြီးမေငယ်၊ ပကတိကေ၊ ဟိပါရေ၀ါ၊ တဇာတန္တိ၊ အစ်မကြီးငယ်၊ လှသက်ဝေရို့၊ သတ်သည်ဟိက၊ အမိမောင်ကြီး၊ အသီးသီးကေ၊ ၀ရီးဆွီမျိုး၊ နွယ်အရိုးဟု၊ အဘိုးအဘောင်၊ အင်အားထောင်၍၊ စုံအောင်ပြီးလည်း၊ များထိုထိုရို့၊ ဆိုညှဥ့်ဆဲကေ၊ အိုလည်နှမ၊ မကြောင်းကြနှင့်၊ နာမမချို့၊ တောရိပ်မြိုင်လေ၊ ဂနိုင်မြို့ဟု၊ ငရို့နီရာ၊ ကျီးဖြူရွာကို၊ လာပါလတ်ဆို၊ လှမေပျိုက၊ ငိုယိုပြောကာ၊ မောင်ရို့ရွာလျှင်၊ ဇာမှာဟိသည်၊ စုံတစိမျှ၊ မသိချေဘဲ၊ လာမည်အရေး၊ နှမသက်နှံ၊ စိန်ကုံးတံမှာ၊ အလွန်ခဲဟု၊ ငိုမြဲငိုကာ၊ ဆိုပါလီကေ၊ ငါရို့ရွာပြည်၊ မသိချေသော်၊ လာမည်ကြောင်းလမ်း၊ ခရီတိုကေ၊ ထိုစခန်းကို၊ မှာတန်းနှင့်သည်၊ အဂယောင့်ငိုကေ၊ မေပျိုဖျန်းကို၊ ညွှန်းလိုက်မည်ကား၊ ဤသည်ပြည်ရွာ၊ မြောက်မျက်နှာက၊ ထွက်ခွာမနီ၊ လားတုံလီက၊ သိစီကြောင်းရီး၊ လမ်းဖုံဖုံမှာ၊ လူကြုံမိန်းလို့၊ ခရီးဇင်္ခါ၊ ယင်းမှာကျွဲကျောင်း၊ ဆိတ်နွားကျောင်းရို့၊ လမ်းကြောင်းတလျှောက်၊ တစခန်းကို၊ လှမ်းလို့ရောက်က၊ တယောက်သက်နှံ၊ စိန်ကုံးတံမှာ၊ တန်းခွန်လှပ်လှပ်၊ လီသွတ်သွတ်နှင့်၊ ဇရပ်ကေသာယာ၊ ကျီးဖြူရွာလျှင်၊ ဇာမှာဟိသည်၊ လှမေပျိုမှာ၊ သိလိုရေနှင့်၊ မိန်းပါလီလေ၊ မိန်းလီသောခါ၊ ကျွဲနွားကျောင်းရို့၊ လမ်းကောင်းရာကို၊ ညွှန်ပါလိမ့်မည်၊ ငါရို့နီကေ၊ မြိုင်ခြီသာယာ၊ ကျီးဖြူရွာကို၊ မေသာမယေ၊ လိုက်လာရန်ကို၊ ညွှန်းကာပြောကေ၊ မှာထားရေလေ။   ။

မှာတုံလီကေ၊ ယုံကြည်စိတ်ချ၊ ငါရို့ရွာကို၊ လိုက်လာကမူ၊ နှမကညာ၊ လှကလျာမှာ၊ တခါရံထူး၊ မစားဘူးငြား၊ နတ်သုဒ္ဓာလေ၊ ရသာများကို၊ စားရစီမည်၊ ခါတလေလျှင်၊ မြင်သည်တထူး၊ စကားဟန်လေ၊ ပြောသံများကို၊ မကြားဖူးလဲ၊ အထူးတထွေ၊ ဆန်တကြယ်ကို၊ သက်ဝေနှမ၊ လာလီကျင်သော်၊ မေမြင်ရမည်၊ ထိုမှတထူး၊ ၀တ်မည်ပြင်ကို၊ မမြင်ဖူးဘဲ၊ အကျူးအလွန်၊ ထူးအချွန်ကေ၊ ကျောက်သံပတ္တမြား၊ ကိုးပါးန၀ရတ်၊ အမျိုးမြတ်သည်၊ နတ်ဝတ်စားကို၊ ပျိုချောနှမ၊ ကိုယ်သဇင်မှာ၊ ဆင်ပါရမည်၊ အသွယ်သွယ်လျှင်၊ မှာလီသမျှ၊ နှမ်းတဖျာကြောင့်၊ နွမ်းဗျာယနှင့်၊ နှမညှိုးငယ်၊ မစိုးလီကဲ့၊ သေသေချာချာ၊ စကားမှာ၍၊ ငါးရာကျီးပေါင်း၊ တသောင်းသောင်းနှင့်၊ လျှင်ကြောင်းမကြာ၊ ပျံလီပါကေ၊ ထိုသည်အခါ၊ မိမာတာရို့၊ ပြန်လာတုံမြောက်၊ နီညိုညိုနှင့်၊ သုံဗိုရ်လောက်မှာ၊ ရောက်လီသောခါ၊ လှမ်းကာမမြင်၊ ကြောင်းခြင်းအင်ကို၊ မိခင်စစ်ဆီး၊ လှမေပျိုကို၊ ဆိုကာမိန်းရေ၊ အိုလည်းသဲအူ၊ သမီးဖြူလေ၊ နီပူလှမ်းကျင်၊ နှမ်းမမြင်ကေ၊ ပျင်ကာပြုငြား၊ သမီးဖြူမှာ၊ သိမ်းယူထားလာ၊ မိန်းငြားသောခါ၊ သမီးတော်က၊ ငါးရာကျီးပေါင်း၊ တစိတောင်ဟု၊ အကြောင်းပြောလျှင်၊ မဆုံခင်ကို၊ ကိုင်ငင်တခတဲ၊ ဆတောက်ဆံကို၊ နောက်လှန်ဆွဲလို့၊ ဆိုဆဲမကျီ၊ ဟက်ကရီကေ၊ ပြာရီကျွတ်မ၊ ဖွဲရာတိုင်ကေ၊ ပြာရာကျွတ်မည်၊ နှမ်းကတဖျာ၊ လှမ်းထားရာဝယ်၊ ကြည့်ပါတုံဘိ၊ အိမ်ရှိပြင်မှာ၊ ဖျာလျှင်ဟိလို့၊ တစိမကျန်၊ နင်တဖန်လျှင်၊ ပြန်၍ရစီ၊ လှမ်းထားလီကေ၊ နှမ်းဒေလကို၊ ရှာရမည်ဟု၊ သတ်လီသောခါ၊ ဘပီတာကို၊ ခိုကပ်တွယ်ဝင်၊ ပြီးလတ်ကျင်ကေ၊ ထိုသည်ဖခင်၊ မိထက်ပင်လေ၊ ဆွဲငင်သတ်ပြန်၊ အစ်မထံမှာ၊ မကျန်သီးသီး၊ ခိုရာမမြင်၊ ထိုခါတွင်လေ၊ ၀င်၍ပြီးက၊ မေကြီးမေလတ်၊ မချမ်းသာအောင်၊ ၀န်းကာသတ်ကေ၊ မတတ်သာကြံ၊ သူ့ဝရီးနှင့်၊ မိကြီးထံက၊ မကျန်အမျိုး၊ လွတ်အောင်ချောင်ကေ၊ ဘောင်အဘိုးက၊ ကိုးရာမမြင်၊ ၀င်ရာမရ၊ သတ်ဆဲဆိုကေ၊ ထိုကာလ၌၊ အထက်ဝဠာ၊ ထိုမြို့ရွာမှာ၊ စိုးကာနီမြောက်၊ သူရီယာလေ၊ ရောင်ဝါ၀င်းကေ၊ မိုးလင်းသောက်က၊ တယောက်ထံသာ၊ ကျီးဖြူရွာကို၊ မိန်းကာမယေ၊ လားတုံပေက၊ လမ်းဝယ်တွိငြား၊ ကျွဲကျောင်းသားကို၊ စကားမကျန်၊ ကြောင်းသတင်းကို၊ မိန်းခြင်းဟန်က၊ တန်းခွန်လှပ်လှပ်၊ လီသွတ်သွတ်နှင့်၊ ဇရပ်ကေသာယာ၊ ကျီးဖြူရွာကို၊ သိပါတုံက၊ မေသက်နှံကို၊ လမ်းညွှန်ပြဟု၊ ခွန်ဟချိုအီး၊ ဤသို့မိန်းသော်၊ ကျွဲးကိုထိမ်းငြား၊ ထိုယောက်ျားမှာ၊ ပျိုချောနှမ၊ ကျီးးဖြူနီရေ၊ ရပ်ဒေသက၊ ၀ီးလှသိမ့်ရေ၊ သို့ဖြစ်ပေ၍၊ နှမကိုယ်ကျည်း၊ တယောက်ထဲမှာ၊ ကျွဲချီးတပုံ၊ ပစ်ခပါအုံ့၊ နွားချီးတပုံ၊ ပစ်ခပါအုံ့၊ ထမင်းတဆုပ်၊ ရီတမှုပ်ကို၊ ကျွန်ုပ်နှမ၊ စားခပါအုံ့၊ ကွမ်းဆီးတယာ၊ ယာပြီးခါမှ၊ စားပါလီအုံ့၊ နှမငယ်ချို၊ လှမေပျိုကေ၊ ချိုပြုံ့ပြုံ့လေ။   ။

ချိုပြုံ့ပြုံ့ကေ၊ ဆိုတုံပြန်ကာ၊ မောင့်မိတ္တာကြောင့်၊ စားပါတော့မည်၊ လှသက်ဝီမှာ၊ ဆိုလီသမျှ၊ အလုံးစုံလေ၊ ကုန်အမှုကို၊ ပြုပြီးမှလျှင်၊ ထိုကတခါ၊ လားလီပါက၊ ပမာနည်းတူ၊ နွားကျောင်းသူကို၊ မြင်မူတွိခါ၊ ကျီးဖြူရွာကို၊ မိန်းပါလတ်မူ၊ ကျွဲကျောင်းသူရို့၊ အတူတူကေ၊ ပြောတုံလီက၊ နှမညိုမြ၊ ပြုပြီးမှလျှင်၊ ထိုကတဖန်၊ တတောဝင်ကေ၊ တပြင်သန်းလို့၊ လှမ်းလီပြန်သော်၊ လမ်းညွှန်ခဲသျှောင်း၊ ဆိတ်ဝက်ကျောင်းနှင့်၊ ၄င်းနည်းတူ၊ ကျွဲကျောင်းသူကို၊ မိန်းမူတဖန်၊ ရှိကိုမှန်းလို့၊ လှမ်းလီပြန်ဟု၊ ပြညွှန်ခဲတုံ၊ လမ်းဖုံဖုံတွင်၊ လူကြုံတိုင်းမိန်း၊ ရှိခရီးကား၊ ရပ်ဝီးမြီတာ၊ ကျီးဖြူရွာကို၊ ဖွေရှာမယေ၊ လားတုံလီက၊ မြိုင်ခြီခရီး၊ လင်းပြာဂြိုးဖြူ၊ တကြူကြူနှင့်၊ လူမနီကေ၊ တောကြီးမြိုင်ယံ၊ ဆူညညံနှင့်၊ ၀ဲပျံကျီးငှက်၊ တကျော်ကျော်လေ၊ ပင်ပျိုထက်က၊ နှုပ်ဆက်သည့်ဟန်၊ မဘိုတွန်ကေ၊ အသံချိုအီး၊ ဖော်ကွဲသူရို့၊ စိတ်ပူကျွမ်းကေ၊ လွမ်းမစဲဘဲ၊ ၀မ်းနဲလောက်အောင်၊ မြူခိုးမှောင်ကေ၊ တောတောင်ညိုမှိုင်း၊ တဆိုင်းဆိုင်နှင့်၊ အင်တိုင်းရဂုံ၊ ပန်းမျိုးစုံရို့၊ ဖူးငုံလှတင့်၊ ချိန်ရာသီမှာ၊ ခါမှီပွင့်ကေ၊ ရင့်လို့ကြွီလွန်၊ တချို့ကျန်၍၊ ပန်းမာန်ကိုမြင်၊ မေလိုချင်လည်း၊ မရွှင်ညိုးနွမ်း၊ ဖော်မပါကေ၊ မျှော်ကာလွမ်းလို့၊ မြိုင်လမ်းရဂုံ၊ ခိုင်ပန်းစုံနှင့်၊ လွှမ်းချုံမြုံခြီ၊ နှင်းဝီ၀ီကေ၊ စုံလီညှင်းညှင်း၊ သစ်သီးပန်းမုံ၊ မွှီးသင်ထုံကေ၊ ရဂုံတွင်းမှာ၊ ကျီးမင်းစံရာ၊ ကျီးဖြူရွာဟု၊ ဒေ၀ါနတ်သား၊ ကျီးအဟန်ဖြင့်၊ ဖန်ကာဆင်းကေ၊ ကျီးသားငါးရာ၊ နီစံပျော်ကေ၊ ဒေ၀ါနတ်မြို့၊ ပြည်စုံလင်ကေ၊ အင်မချို့ဘဲ၊ လူရို့ဖွေရှာ၊ အဖြာဖြာကေ၊ ရတနာဗိမာန်၊ နန်းဝေယံနှင့်၊ တန်းခွန်လှပ်လှပ်၊ နှင်းမှုံရီကေ၊ လီသွတ်သွတ်နှင့်၊ ဇရပ်ပြောင်ပြောင်၊ ပြဿဒ်ဆောင်ရို့၊ အခေါင်မောက်မောက်၊ မှန်ကင်စိန်ကို၊ နီသျှိန်ကျောက်လို့၊ ထိန်တောက်အရောင်၊ တပြောင်ပြောင်နှင့်၊ ဘုန်းဆောင်နန်းအောက်၊ စိန်ကုံးတံမှာ၊ ရှိကထောက်လို့၊ ရောက်လီသောခါ၊ အောက်ကခေါ်ကေ၊ မောင်တော်ကျီးမင်း၊ ရှိဘ၀က၊ နှမရင်းကို၊ ချက်ချင်းမယေ၊ ဆီးကြိုပေ၍၊ ရွှီလှေကနှင့်၊ နှမတက်မည်၊ ငွေလှေကနှင့်၊ တက်ပါမည်လား၊ မိန်းသည်ကာလ၊ ကျွန်ုပ်မမှာ၊ မိဘအထံ၊ အိမ်ဗ္မိာန်မှာ၊ ထုံးစံဟိရာ၊ နှမတော်မှာ၊ ၀ါးလှေကနှင့်၊ တက်ပါတော့မည်၊ ဆိုတုံပေက၊ ရွှီလှေကကြီး၊ ချာကာပီးလို့၊ တက်ပြီးတုံမြောက်၊ အိမ်ဗ္မိာန်၊ စံရာရောက်ကေ၊ ရီသောက်ချင်သည်၊ တောင်းတုံပေက၊ ရွှီးဖလားနှင့်၊ ပျိုချောနှမ၊ သောက်ပမည်လား၊ ငွေဖလားနှင့်၊ ပျိုချေနှမ၊ သောက်ပမည်လား၊ မိန်းလီငြားက၊ မိဘထုံစိုင်၊ ဂမုံးခိုင်မှာ၊ လက်ကိုင်သောက်မည်၊ ဆိုတုံပေ၍၊ ရွှီဖလားနှင့်၊ ထည့်၍ပီးက၊ ချမ်းအီးရီကြိုင်၊ လှပြုံ့ချိုလေ၊ ပျိုဆံတောက်မှာ၊ သောက်လီရေလေ။     ။

သောက်တုံလီကေ၊ ထိုနှယ်အတူ၊ ရွှီကျီးဖြူမှာ၊ ရေးယူတုံမြောက်၊ ပဌမအရွယ်၊ နှမငယ်လျှင်၊ လည်ရန်ရောက်လို့၊ ခွက်ယောက်ပုဂံ၊ အတန်တန်ကေ၊ မကျန်စားသောက်၊ သဘောက်အိပ်ရာ၊ အဖြာဖြာကို၊ ရတနာရွှီငွေ၊ ဤနှစ်ထွေဖြင့်၊ မိန်းပေသမျှ၊ လှမေပျိုလေ၊ ထိုနှမမှာ၊ မိဘထုံစိုင်၊ လက်ကိုင်သုံးစွဲ၊ ထိုနည်းဟိရာ၊ သုံးပါတောမည်၊ မိန်းသမျှကို၊ နှမငယ်မှာ၊ ပြောပေသောခါ၊ ရွှီတန်းဆာနှင့်၊ အိပ်ရာဂေါင်းအုံး၊ နန်းရိပ်ငြိမ်လေ၊ တအိမ်လုံးမှာ၊ အသုံးအဆောင်၊ တပြောင်ပြောင်ကေ၊ ခြင်ထောင်ကုလကာ၊ လွန်နွဲ့ငြိမ့်လို့၊ ပန်းမွိ့ရာမှာ၊ ရှုမျှော်မညီး၊ မှုခပ်သိမ်းကေ၊ အပြိန်းအပြောက်၊ မြကြာညောင်မှာ၊ ပြောင်ပြောင်တောက်ကေ၊ စိန်ကျောက်ပုတီး၊ မိုက်မဲမှောင်တွင်၊ လျှပ်ရောင်ပြီးကေ၊ ပုလဲတတန့်၊ ရွဲတတန့်ကေ၊ အကန့်အကွက်၊ အ၀တ်တန်းဆာ၊ နတ်တန်းဆာဖြင့်၊ လွှမ်းကာကြက်လို့၊ နှိုက်သက်စရာ၊ နွဲ့ကာပျော်လို့၊ မွိ့ပျော်လောက်အောင်၊ ရွှီနန်းဆောင်မှာ၊ သူ့မောင်ချီးကျူး၊ တောရိပ်မြုံမှာ၊ ဂုဏ်ဒြပ်နှင့်၊ နတ်တဦးကေ၊ သတ္တရုကျီးမင်း၊ မင်းရှိဘ၀၊ နှမရင်းကို၊ ပ၀င်းထိန်တောက်၊ လနှင့်နီယောင်၊ စိန်နှင့်ကျောက်ကို၊ ဇေတောက်တန်းသည်၊ ကစပ်စီ၍၊ ထားလီတုံကျင်၊ ထိုခါတွင်ဝယ်၊ တပင်စံသီ၊ ရင့်မကြီးကေ၊ မင်းသမီးမျှ၊ ပမာနသို့၊ နှမသက်နှံ၊ စိန်ကုံးတံမှာ၊ ရှိကံအလျှောက်၊ ကုသိုလ်ဟုံလေ၊ ဂုဏ်တန်းခိုးကေ၊ အကျိုးထောက်လို့၊ မိုးသောက်လင်းဝါ၊ ရောက်သောအခါလျှင်၊ ငါးရာကျီးသား၊ မြောက်ဟေ၀န်ကို၊ ၀ဲပျံလားလို့၊ စားသုံးမညီး၊ ပန်းသစ်သီးကို၊ ကိုက်ပြီးချီကာ၊ ဆောင်ယူလာ၍၊ နန်းမှာရောက်လျှင်၊ မေ့ဂေါင်းတွင်၌၊ ပန်ဆင်စီငှာ၊ ငါးရာကျီးရို့၊ ပီးဆက်လာကေ၊ အာသာဝတီ၊ သရဘီနှင့်၊ နှင်းနီနှင်းဖြူ၊ ကက္ကရူကေ၊ မဉ္ဖူပန်းထူး၊ ပုဏ္ဏရိတ်ကေ၊ ဆိတ်ဖလူးနှင့်၊ ထင်းရူးချပ်တရာ၊ စကတ္တာကေ၊ ကံ့ကော်ကြိုင်ရွှမ်း၊ ဟံကားစံပယ်၊ အသွယ်သွယ်နှင့်၊ ဒဝေပန်းက၊ နန်းတိုင်လည်းအီး၊ တတိုင်းမွှီးကေ၊ မြတ်လေးစွယ်တော်၊ အဝေယာနှင့်၊ မာလာကတ္တရီ၊ ခိုင်ရွှီတီကေ၊ နှင်းဇီကျက်ရုံး၊ နန်းတော်သုံးဝင်၊ ဂမုံးအင်ကေ၊ သဇင်ကုံးကို၊ ဦးလုံးကေသာ၊ မေ့ဂေါင်းပေါ်မှာ၊ ဆင်တော်မူရန်၊ တောဟေ၀န်ကို၊ ၀ဲပျံကာလား၊ ကျီးနတ်သားရို့၊ ဆွတ်ငြားဆောင်ချီ၊ ညှာချင်းစီ၍ဖြူနီဝတ်မှုံ၊ ပန်းမျိုးစုံကို၊ စုပုံကာဆင့်၊ မေ့ဂေါင်းထက်မှာ၊ ကျော်ကာမြင့်၍၊ အပွင့်အခိုင်၊ သင်းကြိုင်ကြိုင်ကို၊ လက်ကိုင်ပြီးလျှင်၊ မေ့ဂေါင်းထက်မှာ၊ တချက်တင်ဗျာ၊ ဆင်ကာချထား၊ နီဝင်၍မူ၊ ပန်းမျိုးစုံလေ၊ မကုန်ငြားက၊ အများကျန်ကြွင်း၊ ပန်းများစွာကို၊ မွိ့ရာခင်းလို့၊ ထမင်းသြဇာ၊ နတ်သုဒ္ဓာနှင့်၊ များစွာသစ်သီး၊ စားမညီးကေ၊ လုံးကြီးလုံးငယ်၊ သုံးဆောင်ဘွယ်လျှင်၊ ထားပေကြလည်း၊ သတ္တမဒီဝါ၊ ခုနှစ်ရက်လျှင်၊ စစ်တွက်ကြာသော်၊ ကိုယ့်ပြည်ကိုယ့်ရွာ၊ ကိုယ့်ဌာနီမှာ၊ မျိုးဆွီမိဘ၊ ဟိသမျှကို၊ စိတ်ကအောင့်မိ၊ မပျော်မွိ့၍၊ တနိခါဝယ်၊ ညဥ့်သိုင်ခေါင်မှာ၊ ယောင်ကာထကေ၊ တငိုရေလေ။          ။

တလို့ငိုကေ၊ ထိုသည်အခါ၊ ကြောင်းရီးရာကို၊ မိန်းပါလီကေ၊ ချကာမကာ၊ စိန်ကုံးတံမှာ၊ ပြန်ကာပြောကေ၊ နတ်သားသူဝ၊ ပြောကာဆိုသည်၊ ညိုနွဲ့နောင်းမှာ၊ မကြောင်းကြနှင့်၊ မိဘအထံ၊ လှသဟန်ကို၊ နက်ဘန်ပို့မည်၊ မငိုပေနှင့်၊ ဆိုသည်တုံမြောက်၊ များမကြာခင်၊ ရောင်ဝါ၀င်းကေ၊ မိုးလင်းသောက်က၊ စိန်ကျောက်ရတနာ၊ ထိန်တောက်စွာသည်၊ နီလာဂေါ်မုတ်၊ ဥဿဘယာ၊ ရတနာမြုကေ၊ သုဝဏ္ဏကေ၊ ရွှီငွေများနှင့်၊ ပတ္တမြားတိန်တောက်၊ နီသူရိန်သို့၊ စိန်နှင့်ကျောက်ကို၊ အမြောက်အများ၊ အကျိုးဆောင်ကေ၊ မောင်ကျီးသားမှာ၊ ပီးငြားချင်မူ၊ အကြင်လူလေ၊ မြင်သူမသိ၊ မရိပ်မိအောင်၊ ငါးပိငါးပုပ်၊ ဆားကိုပိုင်လေ၊ ကိုင်နှင့်တုတ်လို့၊ ပချုပ်ဘူးဖါ၊ ရက်သည်နှီးနှင့်၊ ထည့်ပြီးခါမှ၊ မိန့်မှာလိုက်မည်၊ စိန်ကုံးတံဟု၊ ဘုန်ကံလှကေ၊ နှမငယ်မှာ၊ ကိုယ့်ပြည်ရောက်ခါ၊ ဤဘူးဖါကို၊ ညာတကာနဉ္စ၊ ဟိသမျှနှင့်၊ မိဘဘီးဘိုး၊ ဆွီမျိုးခုနှစ်ဆက်၊ မိမိနီကေ၊ အိမ်ပေါ်ထက်၌၊ တက်စီပြီးခါ၊ တိုက်ခန်းသာတွင်၊ ကုလာကာခုနှစ်တောင်၊ ခြင်ထောင်ခုနှစ်ထပ်၊ အတန်တန်လေ၊ ရံကာပတ်လို့၊ သေသပ်ကောင်းစွာ၊ ဤဘူးဖါကို၊ ဖွင့်ပါတော့လေ၊ မိဘထံကို၊ ပြန်ကာလားသော်၊ လမ်းကြားဝယ်၌၊ နှမညိုနွဲ့၊ ဖွင့်မကြည့်နှင့်၊ ဘေးတွိ့တတ်သည်၊ မေ့မြို့ရွာကို၊ လာသည်လမ်းက၊ ပြန်လှမ်းလီဟု၊ သေသေချာချာ၊ ခြင်းရာများကို၊ ပြောကာမှာ၍၊  ဟေမာတောတန်း၊ တောစခန်းကေ၊ တောလမ်းဆုံးအောင်၊ ကျီးနတ်မောင်မှာ၊ ယူဆောင်တတန်၊ မိဘနီကေ၊ ရွှီပြည်မြို့သို့၊ လိုက်ပို့ညွှန်သော်၊ ပြန်သည်ကာလ၊ ပဌမလျှင်၊ တွိ့ချတုံသျှောင်း၊ ကျွဲနွားကျောင်းနှင့်၊ ဆိတ်ကျောင်းရို့ကို၊ စကားဆိုလို့၊ အိုအိုမောင်တော်၊ ကိုယ်ချမ်းသာကေ၊ ကျန်းမာလျက်လား၊ ကျွန်မတတန်၊ မိဘထံကို၊ ပြန်ကာလားဟု၊ ပြောလီသောခါ၊ ကျွဲကျောင်းဟန်သို့၊ ဖန်နီလတ်ကေ၊ နတ်ဒေ၀ါရို့၊ သောက်ပါရီအီး၊ မေ့ကိုပီးလို့၊ ဆီးကွမ်းကိုစား၊ ၀ီးခရီးလာ၊ ချွေးစီဖြာသို့၊ ညောင်းညာညောမည်၊ နားခပါအုံ့၊ နှမမေလို၊ လှမေပျိုကေ၊ ချိုပြုံပြုံဟု၊ လမ်းဆုံးအောင်သည်၊ ခေါ်ကြပေလည်း၊ မနေမနား၊ ရောက်ချင်လိုက၊ ထိုသည်ဇောနှင့်၊ ပြန်လားတုံမြောက်၊ ချမ်းရိပ်ငြိ်မ်နှင့်၊ နီအိမ်ရောက်ကေ၊ နှစ်ယောက်မိဘ၊ သမီးလှလျှင်၊ ထိုည၌သည်၊ ပျောက်ခရေဟု၊ ရှာပေတုံမြောက်၊ ရင်သွီးသည်းအူ၊ သမီးဖြူသည်၊ သူလျှင်ရောက်က၊ တယောက်တချက်၊ ကောက်ကာရွက်လို့၊ အသက်တမျှ၊ သမီးလှကို၊ တောကလည်းလာ၊ နှမ်းတဖျာကြောင့်၊ ၀န်းယာပုတ်ခတ်၊ ပဇာရပ်မှာ၊ သည်းပွတ်ရတနာ၊ ဤမျှကြာအောင်၊ နီပါသနည်း၊ အဖြာဖြာလေ၊ ခြင်းရာရီးကို၊ မိန်းကေတုံ့ပြန်၊ စိန်ကုံးတံမှာ၊ မကျန်စကား၊ ခြင်းမျိုးစုံကို၊ ကုန်အောင်ပြောရေ။       ။

ကုန်အောင်ပြောကေ၊ စကားခြင်းရာ၊ ကျီးမောင်တော်လျှင်၊ မှာသည်အရ၊ ဆွီမျိုးညာတကာ၊ ဟိလီရာကို၊ ခေါ်ပြီးမှလျှင်၊ မိဘအိမ်မှာ၊ တိုက်ခန်းသာ၌၊ ကုလာကာခြင်ထောင်၊ လုံအောင်ကွယ်ကာ၊ ပချုပ်ဖါကို၊ အုပ်ကာမြှင့်လို့၊ ဖွင့်လီပါကေ၊ ရတနာကိုးမျိုး၊ တပြောင်ပြောင်လေ၊ အရောင်ထိုးလို့၊ အဘိုးထိုက်ဝန်၊ ရလီပြန်ကေ၊ အလွန်ဝမ်းမြောက်၊ မိဘမျိုးဆွီ၊ အစိုင်ကြွယ်ကေ၊ ရွှီပင်ပေါက်သို့၊ တယောက်မကျန်၊ သင့်လောက်တန်အောင်၊ အမွန်ရတနာ၊ ပီးဝီခြမ်းလို့၊ နှမ်းတဖျာကြောင့်၊ ချမ်းသာသုခ၊ လောကဓံမှာ၊ ခံစားရကေ၊ ဓနရွှီငွေ၊ စိန်ကုံးတံမှာ၊ ကံအကျိုးကြောင့်၊ တမျိုးကြွယ်လို့၊ ထို့နှယ်ပမာ၊ ထိုမြို့ရွာမှာ၊ သညာနာမ၊ အညတ္တဖြင့်၊ မိဘနှစ်ပါး၊ လင်းမယားမှာ၊ သည်းကြားရင်သွီး၊ ချစ်မညီးကေ၊ သမီးရတနာ၊ မိသီတာကို၊ ခေါ်ဝေါ်နာမ၊ မေ၀ံဂအား၊ တေလီဗီစံ၊ ကောင်မွန်ရသာ၊ တောင်းပန်ခါတွင်၊ တဖျာသောနှမ်း၊ လှမ်းကာစောင့်ထား၊ မိဘနှစ်ဖြာ၊ အိမ်ဂေဟာက၊ လယ်ယာလားက၊ ကျီးသားငါးရာ၊ စားပြီးခါမှာ၊ ခြင်းရာစကား၊ ရှိပမာသို့၊ အမှာထားလို့၊ နှစ်ပါးမိဘ၊ ရောက်တုံလီသော်၊ မေ၀ံဂကို၊ သတ်ကြသောခါ၊ ကျီးဖြူးရွာသို့၊ လျှင်စွာမယေ၊ လားတုံလီကေ၊ လမ်းဝယ်တွိငြား၊ ရှိအလားသို့၊ ကျွဲနွားထိန်းကျောင်း၊ တွိသောသူလေ၊ လူအပေါင်းကို၊ အကြောင်းမိန်းမူ၊ ရှိနည်းတူလျှင်၊ ကျီးဖြူစောင့်ထား၊ နွားကျောင်းသားရို့၊ ပြောငြားတုံ့ပြန်၊ စိန်ကုံးတံသို့၊ မခံသည်းညှဲး၊ သူရို့ကိုလေ၊ ဆိုကာဆဲလို့၊ မိန်းမြန်းကာလ၊ ပြောသမျှကို၊ ဒေါသမာန်ပါ၊ မခံသာအောင်၊ နှုတ်လျှင်ကြမ်းတန်း၊ မေ၀ံဂကေ၊ မိမ္မသွန်းမှာ၊ လမ်းကိုလျှေက်ကာ၊ ကျီးဖြူရွာကို၊ ရောက်ခါကာလ၊ ရွှီလှေကနှင့်၊ တက်ထတကေ၊ ငွေလှေကနှင့်၊ တက်ပမည်လား၊ မိန်းသည်ကာလ၊ ရွှီလှေကကို၊ ရမှတက်မည်၊ ဆိုတုံပေက၊ ရွှီငွေကိုကာ၊ ထိုအခါဝယ်၊ သိုကာထားလို့၊ သစ်သားလှေက၊ ၀ံဂမေမှာ၊ တက်လီရလို့၊  ထက်မှာရောက်ခါ၊ ရှိပမာသို့၊ အိပ်ရာသဘောက်၊ စားသောက်သမျှ၊ စိန်ကုံတန်ယောင်၊ မိန်းပြန်ကြသော်၊ ၀ံဂမေမှာ၊ ရွှီကိုသာလျှင်၊ ဆိုကာလည်းပြော၊ ထိုစကားကြောင့်၊ သစ်သားကရိယာ၊ တန်းဆာများနှင့်၊ ထားလီပါကေ၊ ရှည်ကြာတွက်စစ်၊ ခုနှစ်ရက်လျှင်၊ မှတ်ပိုက်နီကာ၊ လားမည့်ခါတွင်၊ ဘူးဖါအကြီး၊ သူနှင့်လျှော်အောင်၊ ထည့်ကာပီးလို့၊ ရှိနည်းတူစွာ၊ အရာရာကို၊ မှာကာလည်းထား၊ လမ်းစပ်ကြားမှာ၊ စကားကိုမိ။ပချုပ်ဖါကို၊ အသာမြှင့်ကေ၊ ဖွင့်မကြည့်ကဲ့၊ ဖီးတွိတတ်သည်၊ ၀ံဂမေကို၊ မှာပေတန်တန်၊ မိဘထံကို၊ ပြန်ကာလားရာ၊ ကျွဲနွားကျောင်း၍၊ မတွိပါကေ၊ ကွယ်ကာလည်းနီ၊ မိဘထံကို၊ ပြန်လာမြောက်ကေ၊ ရောက်လီတုံရေ။   ။

ရောက်တုံလီကေ၊ ထိုသည်အခါ၊ မျိုးဆွီညာကို၊ ခေါ်ဝေါ်တုံပြီး၊ အသီးသီးကေ၊ မောင်ကြီးမောင်ငယ်၊ ချစ်ကြိုးသွယ်သည်၊ အစ်မေအစ်မ၊ ချစ်မညီးကေ၊ ရောက်မခဲအို၊ မျောက်သားဆိုကေ၊ ထိုထိုအကြီး၊ ၀ရီးကစ၊ မိကြီးတွင်ကေ၊ ရီးသျှင်မနှင့်၊ ဘောင်မအဘိုး၊ နွယ်အရိုးဟု၊ ဆွီမျိုးခုနှစ်ဆက်၊ သူရို့နီကေ၊ နီအိမ်ထက်မှာ၊ အုပ်ကျက်များစွာ၊ ရောက်သောခါလျှင်၊ လှောင်ကာအတွင်း၊ အထဲခန်းမှာ၊ နွားများစွာကို၊ ခြံမှာသွင်းသို့၊ ဂြင်းဂြင်းဂြိတ်ဂြိတ်၊ တန်းခါးစုံကို၊ အကုန်ပိတ်လို့၊ ထဲစိတ်ဝမ်သား၊ ပချုပ်ဖါကို၊ ထိုခါမယေ၊ ၀ံဂမေလျှင်၊ ဖွင့်ပေသောခါ၊ လှောင်၍ပါကေ၊ များစွာသောင်းသဲ၊ ပချုပ်ဖါခေါ်၊ ဘူးအထဲက၊ မြွီပွီးမြွီဟောက်၊ အဆိပ်တောက်ကေ၊ ငန်းပြောက်ငန်းမြွီ၊ ငန်းသခြွီရို့၊ အစွယ်မြမြ၊ ကြောက်ဖွယ်ကောင်းလျှင်၊ ပေါက်လီကြကေ၊ ထပြီးမလွတ်၊ ကျိတ်ကျက်ခတ်လို့၊ ပိတ်လတ်သာကျင်၊ အထဲတွင်လေ၊ မျက်မြင်ဆင်းရဲ၊ တယောက်ထက်တွင်၊ တယောက်တင်ကေ၊ မှောက်လျှင်လဲလို့၊ သဲသဲရုံးရုံး၊ တထဲလုံးကေ၊ ပြုန်းပြင်ဆံခတ်၊ ငါးများဖျင်လေ၊ ၀င်သည့်မြုံးမှာ၊ ရုံးမလွတ်သို့၊ သက်ပြတ်ဇီဝေ၊ ၀ံဂမေလေ၊ အဆွီအမျိုး၊ နွယ်အရိုးဟု၊ ဘီးဘိုးအလုံး၊ ယာခွတ်ပိုင်ချောင်၊ အစိုင်ပြုန်းလို့၊ ဤထုံးဤပုံ၊ အလုံးစုံကို၊ အာဂုံညာဝက၊ ခပ်သိမ်းသူရို့၊ ပြုတုံကြလို့၊ လောဘတရား၊ မလိုက်စားနှင့်၊ မိုက်မှားတတ်သည်၊ ပဌမပြောကေ၊ မ္မိငယ်မှာ၊ တည်ကြည်သဘော၊ ရို့သောအားကြောင့်၊ စားသောက်မကုန်၊ စည်းစိမ်ဟုန်နှင့်၊ ပြည့်စုံသုခ၊ ခံစားရလို့၊ မိဘမျိုးဆွီ၊ ကြွယ်သည်မက၊ စိန်ကုံးတံမှာ၊ ရှိကံမလို့၊ အဋ္ဌ၀လာ၊ တိုင်းအောင်ချာကို၊ အာဏာစိုးချုပ်၊ များပြည်သူကို၊ မပူရအောင်၊ ကြက်မအုပ်သို့၊ သမုတ္တနတ်၊ လေးကျွန်းပတ်သည်၊ မန္ဓာတ်ပမာ၊ မြတ်ရာဇာဟု၊ ဗြဟ္မာသက္က၊ နာမတွင်ခြင်း၊ ဖြူထီးရိပ်ခို၊ စောဘုန်းမိုလေ၊ ထိုသည်မင်းလျှင်၊ သတင်းစကား၊ ကြောင်းခြင်းရာကို၊ ကောင်းစွာကြားက၊ ရထားမြင်းဆင်၊ ရွှီထမ်းစင်နှင့်၊ တင်ခီရမည်၊ မိန့်မှတ်ပေကေ၊ မတ်ငယ်မတ်ကြီး၊ အသီးသီးရို့၊ မှုတ်တီးကရိယာ၊ အဖြာဖြာကေ၊ ဒူရိယာကားပါး၊ တံတျာကေ၊ သံသာများက၊ မိဖုရားတန်းဆာ၊ ကမ္ဗာနှင့်၊ ဒွါဒရာမျိုးမျိုး၊ ပန်းစုံခြယ်ကေ၊ ရွှီးခါးကြိုးက၊ ဆံထုံးဆချပ်၊ လနှင့်နီယောင်၊ စိန်နကပ်နှင့်၊ ဘယပ်လည်းဆွဲ၊ ကျောက်မျက်ရွှဲကေ၊ ပုလဲမုတ္တာ၊ ရတနာလေ၊ တန်းဆာစုံလင်၊ ရွှီထမ်းစင်မှာ၊ ယူတင်တုံပြီး၊ မူးမတ်ကြီးရို့၊ မင်းသမီးဟန်၊ စိန်ကုံးတံကို၊ ခြွီရံများစွာ၊ အိမ်ဂေဟာတွင်၊ တန်းဆာလည်းဆင်၊ ရွှီထမ်းစင်နှင့်၊ ဆောင်တင်ပြီးထွေ၊ တောင်နန်းလယ်မှာ၊ မဟေထွဋ်ထား၊ ပြည်ကြီးသျှင်မှာ၊ တင်မြှောက်စားလို့၊ မိဖုရားအစစ်၊ စိန်ကုံးတံမှာ၊ ကံအကြောင်းကေ၊ ဟောင်းအသစ်ကြောင့်၊ ဖြစ်ရတုံလီ၊ ဆင်ခြီဆုံးလို့၊ ထုံးသက်သီလျှင်၊ လွန်လီရှိက၊ စိန်ကုံးတံနှင့်၊ မေ၀ံဂကို၊ ဓမ္မသံဝေ၊ အကြောင်သူရို့၊ ယူကာဆကေ၊ ရကတ်စီလေ။           ။

ဤလည်လည်ကေ၊ ဤလည်ယခု၊ ဤဆင်ခြီလေ၊ ဤ၀တ္ထုကို၊ စပ်ပြုကာကုံး၊ ဖတ်ရှုစိငှာ၊ သာခြင်းစီကေ၊ သက်သီဆုံးလို့၊ နိဂုံးချုပ်မည်၊ အတီတေကေ၊ လွန်လီရှိခါ၊ ဖြစ်ပျက်ပါသည်၊ များစွာထုံးပုံ၊ အလုံးစုံကို၊ အကုန်အစင်၊ မသိကျင်လည်၊ ယခင်ရှိက၊ လူ့ဝေါဟာလေ၊ ပေါရဏဖြင့်၊ ပြောကြသီးသီး၊ နမူနာလေ၊ ယူကာမှီးလို့၊ သက်ကြီးစကား၊ ဆက်ကာသွယ်ကေ၊ သက်ငယ်နား၌၊ ကြားရဖန်ဖန်၊ ဖြစ်ပျက်ဟန်လေ၊ ပုံစံနည်းနာ၊ ရှိအထက်က၊ ဆင်းသက်လာကေ၊ ခုခါသမယ၊ ခေတ်ကိုချသော်၊ ကာလအလျှောက်၊ ရှိထုံးပုံလေ၊ လုံးစုံပျောက်လို့၊ မလျှောက်မပတ်၊ တလိုင်းဟံသာ၊ တိုင်းမြန်မာက၊ ပေါ်လာလတ်ကေ၊ ပြဇာတ်တေးအုပ်၊ ပုံနှိပ်ထုတ်လို့၊ ကျွန်ုပ်ရို့နီ၊ ရခိုင်ပြည်တွင်၊ နယ်ပယ်နှံစပ်၊ အရပ်ရပ်၌၊ ဖတ်ရွတ်များစွာ၊ လားလီရာမှာ၊ ကြော်ကာကျွီးလို့၊ တေးကဗျာကို၊ တရွာတဇာတ်၊ တရပ်တဆိုင်း၊ အမျိုးမတူ၊ ရို့ပြည်သူမှာ၊ လူအရိုင်းသို့၊ သိုင်းဟန်ယိမ်းဟန်၊ ဘုန်းကြီးပျံမှာ၊ ထုံးစံယွင်းကွက်၊ ရှိအဆက်လျှင်၊ ပျက်သည်မက၊ တချို့နီကေ၊ ရပ်ဒေသ၌၊ ၀ံသနွယ်ရိုး၊ ဘီးအဘိုးရို့၊ အမျိုးမမှန်၊ ယုတ်ညံပြန်၍၊ တိရိစ္ဆာန်တမျှ၊ လိမ္မာသူသည်၊ မဟိပေကေ၊ ရပ်ဒေသ၌၊ မိမ္မတောင်ပင်၊ က တုံကျင်၍၊ အမြင်ဆိုးလွယ်၊ ရို့ထုံးစိုင်လေ၊ ရခိုင်မျိုးရိုး၊ ရိုးအနွယ်လျှင်၊ ပျောက်ကွယ်မတတ်၊ ဟိပြန်လတ်လို့၊ နိပါတ်ရာဇ၀င်၊ စုံအလင်ကေ၊ ပုံပြင်စုရုံး၊ ကဗျာစီကေ၊ စာစီကုံးလို့၊ ရှိထုံးရှိစံ၊ အတန်တန်တွင်၊ လိပ်ကမ္ဘာမ၊ မရီးမတ်ရို့၊ နီးစပ်ကြသည်၊ မတ်လှမင်းဖြူ၊ ဇမ္ဗူဝတ္ထု၊ သာခြင်းစီဗျာ၊ ဆင်ခြီတမ်းကေ၊ လွမ်းအနုနှင့်၊ ယခုတမူ၊ ရှုမျှော်သူရို့၊ ကျီးဖြူတခန်း၊ ဤကဗျာလေ၊ သာခြင်းဆန်းကို၊ ကျမ်း၌မလာ၊ စာမှာမဟိ၊ ပါဠိမရ၊ သို့ပါသော်လည်း၊ ပေါရဏဟု၊ ရှိကထုံးဟောင်း၊ မပျောက်ကောင်းကေ၊ အကြောင်းထောက်ကာ၊ ဤကဗျာကို၊ စီခါတွက်စစ်၊ ရက်လနှစ်ကား၊ သက္ကရာဇ်ကောဇာ၊ ထောင်နှစ်ရာနှင့်၊ ဖြောင့်စွာတွက်ရွီ၊ ဂဏန်းခြီလျှင်၊ သျှစ်ဆယ်နှစ်ခု၊ မိုးဝသန်နှင့်၊ ဟေမာန်လုလို့၊ ရတုမာသ၊ တချို့မှာလေ၊ နတ္တော်လနှင့်၊ တချို့ကေသော်၊ တန်းဆောင်ဘုန်းဟု၊ သမုတ်ကာဖြင့်၊ ခေါ်ဝေါ်တုံကြ၊ ရွာတရွာတွင်၊ နှစ်ဝါဒနှင့်၊ ဆန်းစငါးရက်၊ ညာမှောင်နက်၌၊ တွက်ကာတွက်ကာ၊ ထွန်းဆရာလျှင်၊ ရွာနတ်ဆိပ်တွင်၊ စာပီသင်လို့၊ စီရင်ကုံးလုပ်၊ ဤထုံးပုံလေ၊ ကုန်ကာဆုံးကေ၊ နိဂုံးချုပ်လို့၊ စာအုပ်ကိုပို့၊ ထက်နတ်ပြည်သို့၊ စစ်တွေမြို့မှာ၊ လူရို့ခေါ်တွင်၊ ကျောင်းတက်လမ်း၌၊ ဆန်းလသွင်သို့၊ ပေါ်ထင်ထွန်းသစ်၊ အက္ခရာစုံ၊ စက္ကြာယုံသို့၊ ပုံနှိပ်တိုက်က၊ ရိုက်နှိပ်လိုက်သည်၊ ရွှီပြည်သူရို့၊ ၀ယ်ယူလတ်ကေ၊ ဘတ်ကတ်လီလေ။ ။         ။

ဤတွင်ရွှီကျီဖြူသာခြင်းပြီး၏။